Eraikitzeko plangintza

1. urratsa: Fitxa teknikoa

Lehenengo fase honetan, proiektuaren datu teknikoak osatuko ditugu. Txostenaren bigarren orrialdean taula bat dago, honako eduki hau biltzen duena:

 

Txostenaren 2.orrialdea

• Taldearen datuak, proiektuaren hasiera- eta bukaera-data, ebatzi beharreko egoera edo arazoa eta lanaren xedea, hau da, jasotako eskaera (garajea eraikitzea).
• Garajeak izango dituen elementuak.
• Ezaugarri tekniko eta estetikoak: koloreak, materialak, garajearen logotipoa eta seinaleztapen bertikal eta horizontala.

Prozesu teknologikoa

Arazo edo beharrizana ebazteko erabiliko dugun lan-metodologia izango da prozesu teknologikoa. Lana faseka zatikatzean datza. Fase bat bukatutakoan, hurrengora pasatuko gara. Horrela lortuko dugu objektu teknologikoa eraikitzea.

2. urratsa: Zereginen kontrol-zerrenda

Galdera sorta hau baliagarri izango zaigu prozesuaren zein momentutan gauden kontrolatzeko eta egiteke dauden zereginak zeintzuk diren gogoratzeko. Lantalde bakoitzean prozesua berrikusiko dugu: zereginak irakurriko ditugu eta horietako bakoitzean bai/ez markatuko dugu.

Horien gainean hausnartuko dugu, eta egin beharreko zeregin guztiak ondo ulertzen ditugun komentatuko. 

 

Txostenaren 3.orrialdea

Garrantzitsua da urratsak hurrenez hurren betetzen saiatzea, zerrendan jasota dauden hurrenkera berean.

3. urratsa: Makina sinpleei buruzko informazioa

Garrantzitsua da garajearen elementu mekaniko bakoitzak nola funtzionatzen duen jakitea. Aztertu dugu dagoeneko bakoitzak zertarako balio duen, baina badakigu nola funtzionatzen duten? Argi daukagu zertan lagunduko diguten elementu horiek? Gogoan dugu zer izen duten eta zergatik?

Bideo honetan oso era argi eta errazean azalduta dago hori guztia.

Txostenaren 4.orrialdea

Orain gai izango gara txostenaren hurrengo orrialdeko informazioa osatzeko, hirugarren atalari dagokion taulan.

Procomun sarearen unitate didaktikoan: «¿Cómo funcionan las máquinas?» atalean jaso dezakegu makinen munduari buruzko informazio gehiago.

4. urratsa: Konpromisoak eta zereginak banatzea

Ufa! Zenbat zeregin! Interesgarria izango da, akaso, ardurak diseinu-taldeko kideen artean banatzea.

Lantaldeetan, normalean, kide bakoitzak zeregin espezifiko batzuk hartzen ditu bere gain; horrela, arduradun bakoitzak zaindu ahal izango du egokitu zaion atala besteentzat ere baliagarria izango dela. Hori da talde-lanaren oinarria!

Gutako bakoitzak gaitasun ezberdinak ditugu, eta erosoago gaude zeregin batzuetan beste batzuetan baino. Pentsatuko dugu, orduan, nork duen gustuko marraztea, guztien lana antolatzea edo koordinatzea, nork nahiago duen materiala bildu...

 

Txostenaren 5.orrialdea

Funtzio-banaketari buruz hitz egin eta zereginak adostu ondoren, rol bakoitzari dagokion izena eta sinadura jarriko dugu taulan. Ziurtatu behar dugu guztiok daukagula argi zer egin behar dugun!

5. urratsa: Zein da ideiarik onena?

Lana ondo antolatzen ari garela dirudi! Gutako bakoitzak ardura bat hartu du bere gain.

Gure garajearen zirriborroa egiteko ordua da. Eraikiko duguna irudi batean islatzea da zirriborroa egitea. Ez da beharrezkoa zehaztasun handiz egitea, baina elementu guztiak jaso behar ditu.

Ideiarik onena marraztuko dugu; taldekide guztien artean pentsatu eta erabaki dugun hori. Horretarako, jarraibide hauek izango ditugu kontuan:

• Banakako zirriborroa: bakoitzak zirriborro bat egingo du (txostenaren seigarren orrialdea) xedeko garajea islatzeko. Ondoren, taldekideei erakutsi eta azalduko diegu.

• Partekatzea: gure ideiak taldekideekin partekatuko ditugu, nork bere proposamena besteei azalduta. Denon artean ideia bat osatuko dugu; gutako baten ideia izan daiteke, edo guztien (edo batzuen) ideien nahasketa.

• Taldearen zirriborroa: gure taldeak egingo duen garajearen zirriborroa marraztuko dugu txostenaren zazpigarren orrialdean. 

Haurrentzako garaje bikaina diseinatzen ari gara, seguru!

Zirriborroa zehaztea

Zirriborroa gehiago zehaztu nahi badugu, txostenaren zortzigarren eta bederatzigarren orrialdeak erabil ditzakegu. Irakasleak lagun diezaguke atal hau egiten, zailagoa baita.

Galdera hauei zer erantzun eman pentsatu behar dugu:

Zenbateko garaiera, zabalera eta sakonera izango du? Zein izango da solairuen arteko altuera? Zer-nolako zabalera izan behar du aparkaleku bakoitzak jostailuzko autoak sar daitezen? 

Argi dago gure garajearen proiektua zehaztasun handiagoz marraztu behar dugula. Krokisa eta ataltzea egin behar ditugu

6. urratsa: Proiektua aurkeztea

Garajea forma hartzen ari da! Bost urteko ikasleen gustukoa izango da, seguru!

Egindako zirriborroarekin pozarren gaude, baina baliteke alderdi garrantzitsuren bat ahaztu izana, elementuren bat faltatzea, haur horientzat egokia ez izatea, edo elementuren bat erantsita hobetu ahal izatea...

Horregatik, komeni da ikaskideei gure ideiaren berri ematea. Adiskideek lagundu ahal izango digute, beharrezkoa bada, aldaketak egiten; eta proiektua hobetzeko ekarpenak egingo dizkigute. Gainera, animatu egingo gaituzte, seguru, baita egindako lanagatik zoriondu ere.

Talde bakoitzak proiektuaren aurkezpena egingo du gelakideen aurrean. Errubrika hau erabiliko dugu, bai beste taldeen proiektuak baloratzeko bai geure aurkezpena prestatzeko.

Página 10 del dossier

Besteen aurrean ideia bat aurkezten dugun bakoitzean, garrantzitsua da hainbat gauza kontuan hartzea:

• Informazioa hurrenkera egokian aurkeztu behar da, ideiaren azalpen xehatua emanez, erakargarria izan dadin.
• Argi hitz egin behar dugu, hizkera eta tonu egokiaz (ez baxuegi ez ozenegi), hitzak ondo artikulatuz, ondo uler gaitzaten; eta komeni da etenaldiak egitea, gure ideia ulertzeko denbora izan dezaten.

Beste taldeei entzuten ari garen bitartean oharrak har ditzakegu txantiloi honetan.

Txostenaren hamaikagarren orrialdean beste taldeen aurkezpenen gainean egindako balorazioak jasoko ditugu, eta proiektua hobetzen laguntzeko iradokizunak idatziko ditugu.

7. urratsa: Ekin lanari!